Н.Е. Амбасадорот на Сојузна Република Германија, Томас Герберих, во своето воведно обраќање на Конференцијата за изборни реформи: Перспективите на македонски избори, изјави дека е крајно време нашето општество да се обедини и тесно да соработуваат сите етникуми со цел да се надминат поделеностите.
Го пренесуваме говорот на амбасадорот Герберих во целост:
Ви благодарам многу што ме поканивте на вашата конференција за изборни перспективи во Република Северна Македонија.
Би ја искористил оваа прилика да изразам искрена благодарност до ЦИВИЛ за сите активности и проекти што ги имаат досега спроведено.
Германија отсекогаш била доверлив партнер на вашата организација во однос на финансирањето на проекти, како и во однос на политичката поддршка. Би сакал да се заблагодарам на ЦИВИЛ за нивната неуморна работа и за сите напори.
Вашите проекти и конференции секогаш давале одличен придонес со години во насока на зближување на владините службеници и граѓанското општество да работат заедно за европска иднина и за промовирање на европски вредности во Северна Македонија.
Утре (26/9/2019) германскиот парламент, Будестагот, ќе донесе одлука за гласањето за почеток на преговори за ЕУ членство на Северна Македонија и Албанија во Советот на ЕУ во октомври.
Јас сум секако оптимист дека одлуката ќе биде позитивна. А потоа сите ја чекаме одлуката на Советот на ЕУ, а јас останувам повеќе од оптимистичен дека ќе има јасна одлука за започнување разговори за пристапување на Северна Македонија во ЕУ.
И покрај сите тешкотии и недостатоци што сé уште постојат, Северна Македонија создаде успешна приказна на Западен Балкан, особено во однос на зближување на регионот. Северна Македонија моментално нема проблеми со своите соседи. Северна Македонија направи голема разлика во историската димензија со Преспанскиот Договор. Тоа треба да претставува пример за целиот регион.
Но, покрај успехот на надворешната политика, сега е битно понатаму да се продлабочи процесот на реформи и да се спроведат реформските закони претходно донесени од Парламентот, вклучувајќи ги, исто така, гласовите на опозицијата.
Овие напори треба да се засилат и да дадат опипливи резултати за секој граѓанин. И овие напори мора да ја вклучат реформата на изборниот систем.
За таа цел, општеството – ова се однесува и на сите делови од вашето општество, вклучувајќи ги сите етникуми – мора да се обедини и сите тесно да работат заедно за да се надмине сé уште постоечката, а понекогаш и зголемена, поделеност на општеството. Тука би сакал да оддадам почит на улогата на претседателот Пендаровски, чие мото секогаш е дека е тој претседател за сите.
Конкретните теми за кои ќе зборувате денес на вашата конференција се исто така централни делови на процесот на ЕУ интеграција во облик на повеќестрана поддршка од тие институции, како и очекувања за напредок кон пристапувањето.
Како активна членка на ЕУ и близок сосед на овој регион, Германија сите овие прашања ги направи приоритет во својата надворешна и безбедносна политика. Фактот што самата канцеларка Меркел ги промовираше во рамките на посебната рамка на Берлинскиот процес, претставува јасен доказ за тоа.
Поддржувањето напори како оваа конференција е конзистентно со пошироката посветеност на Германија кон регионот и кон европското партнерство. Ве охрабрувам сите максимално да ги искористите можностите и предизвиците во ова критично време што следува а и понатаму.
Не сакам да навлегувам во детали за реформата на изборниот систем – знам за дискусиите за менување на постоечкиот изборен модел, кој се базира на поделба на земјата во шест единици – за ова со нетрпение го очекувам вашето мислење и добиените заклучоци од вашата конференција и на сите ви посакувам пријатен и забавен ден.
Б. Ј.
This post is also available in: English
