Незири: Онаму каде што нема слобода на медиуми, нема ниту индивидуални слободи

ЏЕЛАЛ НЕЗИРИ, новинар

Една земја без слобода на медиуми не е сигурна, нема одржливост и има една нејасна иднина. Што носи медиумскиот мрак кој имавме можност да го видиме во земјите од комунистичкиот блок? Поголем дел од нив во 90-те години се соочија со социо-економски колапс што доведе до страшни конфликти.

Онаму каде што нема слобода на медиуми нема ниту индивидуални слободи, ниту достоинство за човекот кој живее таму. Таму човекот е само статистика во функција на власта. Слободата на медиумите е показател дека политиката, државата и општеството немаат ништо за криење, дека немаат теми кои не смеат да се отворат и дека немаат политичари кои не смеат да се критикуваат за девијациите.

Затоа мислам дека 3 мај не е важен ден само за медиумите и новинарите, туку за сите тие кои ги негуваат демократските вредности. Слободните медиуми може да не бидат совршени, но тие се чувари на безбедноста и благосостојбата на граѓаните.


По повод Светскиот ден на слободата на медиумите, сите содржини објавени на медиумската платформа на ЦИВИЛ на овој ден се достапни за објавување според лиценцата Creative Commons 4.0.