Во првото издание на „Изборен рапорт“, ЦИВИЛ им посака успешна и достоинствена кампања на сите кандидатки и кандидати, ги промовираше новите видео содржини и пренесе низа забелешки од независните кандидатки и кандидатки за функции во локалната власт на претстојните избори. „Изборен рапорт“ ќе се емитува во живо, в понеделник, среда и петок, со почеток во 11 часот од прес центарот на ЦИВИЛ. Прилогот го подготви и го водеше Џабир Дерала
Денеска, на полноќ, започна официјалната изборна кампања за локалните избори што ќе се одржат на 17 октомври. ЦИВИЛ им посакува успешна и достоинствена кампања на сите кандидатки и кандидати.
Според податоците што за оваа прилика ги подготви Мониторинг тимот на ЦИВИЛ, за градоначалничката функција се натпреваруваат 297 кандидати, меѓу кои 26 се независни. Тоа не е најголем број на независни кандидати. Најголем број независни кандидати, 25%, имаше во 2005 година, додека процентот на независни кандидати оваа година е речиси трипати понизок – 8,75%.
ЦРНА И ПРЕДВРЕМЕНА КАМПАЊА СО НАЦИОНАЛНИ ТЕМИ
ЦИВИЛ констатира дека се води предвремена изборна кампања. Самата кампања изобилува со дезинформации и лажни вести, а актуелните настани и процеси, меѓу кои трагедијата во Тетово и спасувањето цивили од Авганистан, како и спроведувањето на пописот, се злоупотребуваат во политички, односно изборен контекст, најчесто со цел да се дискредитираат и оцрнат политичките конкуренти.
Кампањата се води во манир на беспоштедна битка меѓу непријатели, а не како натпревар на политички конкуренти кои со своите пораки и програми се обидуваат да ја добијат довербата на граѓанките и граѓаните.
Воедно, се бележи доминација на теми со национален карактер, додека дел од политичките партии ги занемаруваат локалните теми и прашања на кои, впрочем, се однесуваат локалните избори.
ПОЛИТИЧКА ЗЛОУПОТРЕБА НА ДЕЦА И ГОВОР НА ОМРАЗА
Мониторингот на ЦИВИЛ бележи и неколку случаи на употреба на деца во политичка кампања, што е спротивно на Законот за заштита на децата и добрите изборни практики. Веќе се објавени случаи за политичка злоупотреба на децата од партиите СДСМ, ВМРО-ДПМНЕ, ДУИ Алијанса за Албанците.
- Кандидатот на ВМРО-ДПМНЕ за градоначалник на Кисела Вода со злоупотреба на деца во изборна кампања
- Злоупотреба на деца и државни ресурси во (пред)изборна кампања
Во изминатите шест недели, мониторингот на социјалните мрежи бележи и околу 1.000 случаи на говор на омраза кои имаат изборен контекст, односно се препознава нивната партиска позадина.
АКО Е СПОРЕД ЗАКОНОТ, НЕ ЗНАЧИ ДЕКА Е И ЕТИЧКИ ИСПРАВНО
На прагот на официјалната изборна кампања, ЦИВИЛ ги повикува сите политички партии да се придржуваат кон Изборниот законик и добрите изборни практики. Изборниот законик има голем број слабости и не секогаш тоа што е дозволено со законот е и етички исправно.
ЦИВИЛ ги повикува сите граѓанки и граѓани да пријавуваат изборни нерегуларности, притисоци и закани, корупција и да не подлегнуваат на дезинформациите и говорот на омразата.
ЗАБЕЛЕШКИ ОД НЕЗАВИСНИТЕ КАНДИДАТИ
Дел од независните кандидати, во комуникација со Цивил, изнесоа бројни забелешки за нивната положба во изборниот процес. Денеска ќе цитираме само три од повеќето забелешки упатени досега.
1) Независните кандидати на локалните избори немаат простор за маркетинг и дебата во медиумите.
2) Не постојат можности за користење билборди на ударни места во општините. Во таа привилегија уживаат само големите политички партии
3) Независните кандидати сметаат дека се маргинализирани во однос на дефинирање на бројот кој се заокружува на гласачкото ливче.
Цивил овие состојби ги бележи со години наназад и дел од препораките што досега се упатени до институциите и политичките партии се однесуваат на барањата да им се даде повеќе простор и фер можности на помалите политички партии и независните учесници во изборните процеси.
ГЛАСАМЕ – УМЕТНИЧКИ ВИДЕО СПОТ ЗА ГЛАСАЧКА СВЕСНОСТ
На 26 септември, ЦИВИЛ го објави видео спотот Гласаме. Тоа е атрактивно, уметничко видео посветено на гласачката свесност. Овој интересен видео спот е резултат на соработката меѓу организациите Локомотива – Центар за нови иницијативи во уметноста и културата и ЦИВИЛ.
КРАТКИ НОЗЕ – ЕМИСИЈА ЗА РАЗОТКРИВАЊЕ НА ДЕЗИНФОРМАЦИИТЕ
Цивил ја збогати својата продукција на медиумски содржини за дезинформациите и говорот на омразата и со интернет видео емисијата „Кратки нозе“. Првата епизода беше објавена на 24 септември и постигна извонредно висока видливост. Следното издание може да се очекува веќе од утре.
ЦИВИЛ апелира до сите политички партии и структури да избегнуваат да бидат дел од емисијата Кратки нозе, а секако и од рубриките Дезинформации и Говор на омраза на медиумската платформа на Цивил.
ДЕБАТИ И ИНТЕРВЈУА СО КАНДИДАТИТЕ
Цивил организира дебати и интервјуа со кандидатите за градоначалници во повеќе општини низ земјата.
Денеска на програмата на ЦИВИЛ МЕДИА ќе ја проследите дебатата меѓу тројца кандидати за градоначалник на Шуто Оризари, додека веќе утре можете да ја проследите и дебатата меѓу двајца кандидати во Гевгелија.
Мораме да истакнеме дека во последен миг, дел од кандидатите се откажуваат од учество во нашите дебати.
Ги охрабруваме сите да ги прифатат нашите покани, бидејќи нашата медиумска платформа е отворена за сите подеднакво, за сите политички партии, како и за сите независни кандидатки и кандидати.
Преземањето на овие содржини е дозволено и добредојдено. Кратка верзија од видеото:
