Трајкоска: Бестрашно новинарство ослободено од клиентелистички врски

ЖАНЕТА ТРАЈКОСКА, Македонски институт за медиуми

Светскиот ден на слободата на медиумите е само потсетник дека слободата се троши ако не се бориме за неа и дека таа е есенцијата на новинарството. Не смееме да зборуваме за медиумските слободи и права само на вакви денови.

Секој ден мора да ја носиме вистината кај граѓаните, без оглед на сѐ. Мора да го држиме постојан притисокот кон институциите да бидат отчетни и транспарентни, но, не по нивен терк, туку во име на јавниот интерес.

Мора да сме подобри. Ковид-19 сурово нѐ потсети дека слободните медиуми се витални за секој од нас, посебно во состојба на криза кога човековите права се ограничени и многу држави функционираат во вонредна состојба.

Годинава, 3 Мај е фокусиран на новинарство без страв и услуги. Токму тоа и нас ни треба во Македонија – бестрашно новинарство ослободено од клиентелистички врски.

Поддршка за сите професионални новинари и медиумски работници.

Среќен 3 Мај – светски ден на слободата на медиумите!


По повод Светскиот ден на слободата на медиумите, сите содржини објавени на медиумската платформа на ЦИВИЛ на овој ден се достапни за објавување според лиценцата Creative Commons 4.0.