КРИСТИНА КОСТОВА, граѓанска активистка
Слободата на медиумите е клучна за развојот и одржувањето на демократијата. Она што го покажуваат почетоците на ширењето на коронавирусот е колку, всушност, слободата на медиумите (или нејзиното отсуство) влијае врз човечките животи, безбедноста, а конечно и здравјето на граѓаните.
Впрочем, многу е веројатно дека светот немаше да биде запоседнат од пандемија ако на новинарите во Кина им беше дозволено отворено и јасно да разговараат со засегнатите медицински лица и да известуваат за зачетоците на новиот вирус уште од самиот почеток, ако кинеските институции практикуваа(т) транспарентност во работата и ако вистината се вреднува повеќе од зачувувањето на имиџот на светска сила во која сè е подредено по „соодветен“ ред.
Во екот на пандемијата сфаќаме колку се важни медиумските работници кои презентираат веродостојни информации, но и колку нивото на слобода на медиумите и во најоддалечените места на светот може да влијае и да ни „затропа на врата“ кога најмалку очекуваме.
Затоа, на Меѓународниот ден на слобода на медиумите треба повторно граѓаните да си ја повториме заложбата за обезбедување поголем пристап до независни и веродостојни информации обезбедени и презентирани од препознаени и некомпромитирани медиумски работници.
